17.01.2023 | Беларусы свету Адукацыя

Чаму беларусам варта вучыцца за мяжой і якія ёсць магчымасці

Не сакрэт, што ўзровень беларускай вышэйшай адукацыі, на жаль, катастрафічна падае. Апроч таго, актыўныя выкладчыкі і студэнты зазанаюць рэпрэсіі. Добрым выйсцем у такой сітуацыі можа быць навучанне за мяжой. Якія перавагі яно дае, разважае на сваёй старонцы у фэйсбуку культурная дзяячка Аліна Коўшык. Таксама Аліна падзялілася сваім досведам навучання за мяжой і прапанавала спіс стыпендый для міжнародных студэнтаў на магістарскія і доктарскія ступені.

Фота: Julia Szablowska

Я сама калісьці абрала гэты шлях і пасля Гарадзенскага ўніверсітэту, атрымала стыпендыю ў Варшаве. Я ўдзячная маёй смеласці тады (бо магла спакойна паступіць у дактарантуру) і разумею, што гэтае рашэнне ў тым ліку прывяло мяне ў тую кропку, дзе я сёння.

Тады магчымасцяў было не так шмат. Сёння — болей. Але варта быць смелым і спрабаваць можа нават не адзін раз.

Чаму варта вучыцца за мяжой? Таму, што зараз катастрафічна падае ўзровень беларускай вышэйшай адукацыі, а таксама рэпрэсуюцца актыўныя выкладчыкі і студэнты. Тым не менш адукацыя за мяжой вельмі карысная для нашай і вашай асабістай будучыні, бо

— атрымаеце перспектывы выдатнай кар’еры

— узмацніце свае моўныя навыкі

— навучыцеся глабальна мысліць

— адчуйце незалежнасць і свабоду

— навучыцеся быць адказным

— даведаецеся шмат пра іншыя культуры

— станіце больш цаніць сваю культуру

— лепш пазнаеце сябе

— усведаміце хараство простых рэчаў

— будзеце больш шанаваць свой дом, сямʼю і радзіму

— зможаце ў будучыні працаваць на тое, каб Новая Беларусь была свабодным, бяспечным і шчаслівым грамадствам.

Вось спіс стыпендый для міжнародных студэнтаў на магістарскія і доктарскія ступені на 2023/24 год, якія цалкам фінансуюцца.