3 лютага на сустрэчы ў корпусе Еўрапейскага гуманітарнага ўніверсітэта (ЕГУ) ў Абвясці пра абранне новага рэктара. Ім стаў прафесар Кшыштаф Рыбіньскі — доктар эканамічных навук, які на працягу трох гадоў узначальваў Універсітэт Нархоз у Алматы (Казахстан), а пяць гадоў з’яўляўся рэктарам Універсітэта Вістула ў Варшаве (Польшча).
Прафесар Рыбіньскі быў абраны з ліку 17 прэтэндэнтаў на гэтую пасаду. Ён афіцыйна прыступіць да выканання абавязкаў рэктара 3 красавіка 2023 года.
Кшыштаф Рыбіньскі, фота: voxpopuli.kz
Прафесар Рыбіньскі з’яўляецца аўтарам больш як 90 навуковых артыкулаў па эканоміцы, сотняў газетных артыкулаў і некалькіх кніг. Кшыштаф Рыбіньскі атрымаў ступень доктара эканамічных навук у Варшаўскай школе эканомікі, мае таксама ступень магістра камп’ютарных навук. Прафесар Рыбіньскі мае шырокі досвед працы ў дзяржаўнай палітыцы і прыватным сектары, у тым ліку ў якасці намесніка кіраўніка Нацыянальнага банку Польшчы, партнёра ў Ernst & Young ,і галоўнага эканаміста ў ING Barings ды іншых банках. Вольна валодае ангельскай, расійскай і польскай мовамі.
Прафесар Рыбіньскі сказаў: «Хачу выказаць падзяку Кіраўнічай радзе за аказаны давер кіраваць універсітэтам цягам наступных пяці гадоў. З нецярпеннем чакаю супрацоўніцтва з усёй супольнасцю ЕГУ — студэнтамі,выкладчыкамі, супрацоўнікамі, донарамі і партнёрамі — падчас перыяду перадачы паўнамоцтваў. Перакананы, што праз супольныя дзеянні мы зможам вырашаць надзённыя праблемы, якія стаяць перад універсітэтам, і мацаваць статус ЕГУ як вядучай установы для навучання і грамадзянскага ўдзелу ў Беларусі ды рэгіёне ў цэлым».
Дацэнтка юрыдычнага факультэта ЕГУ, кіраўнічка Сенату і сябра Камітэту пошуку доктарка Людміла Ульяшына выказала чаканні, што «прафесар Рыбіньскі будзе далей прасоўваць унікальную ролю ЕГУ ў падтрымцы акадэмічных памкненняў і прафесійнага развіцця маладых беларусаў, а таксама ў судзеянні супрацоўніцтву з беларускай грамадзянскай супольнасцю і прафесіяналамі, міжкультурнаму дыялогу і ўключэнню Беларусі ў еўрапейскую палітычную ды акадэмічную супольнасць».
Па ўступленні на пасаду рэктара прафесар Рыбіньскі засяродзіцца на падаўжэнні акрэдытацыі ЕГУ, забеспячэнні далейшага шпаркага росту колькасці студэнтаў, пашырэнні даследчых магчымасцяў ЕГУ і развіцці перспектыўнага партнёрства з EPAM Systems — Школай лічбавай інжынерыі.
