Дзяніс Шматко — беларускі музыка з гурта «Lity Taler», на дадзены момант дудар гурта «DZIECIUKI», які ўжо год як з’ехаў з Беларусі, адмыслова для budzma.org падзяліўся ўласным топам улюбёных беларускіх песняў.
Фота: budzma.org
Дзяніс Шматко: У мяне атрымалася 6 песняў, якія мяне найбольш зачапілі, расставіў я іх у парадку колькаснага праслухоўвання ў сваім плэй-лісце на рэпіце. Сярод беларускай музыкі мне складана абраць топ трэкаў, каторыя б лічыў самымі лепшымі, самымі значнымі, таму мой рэйтынг будзе складацца з тых спеваў, якія на момант складання гэтага спісу найбольш пасуюць да майго настрою.
1. Palina — Месяц
Гэты трэк я пачуў у свайго сябрука-гукааператара, які запісваў яго. Песня мне вельмі зайшла, я вельмі доўга слухаў яе, і вельмі доўгі час яна стаяла ў мяне на рэпіце. Мне вельмі спадабалася эмоцыя таго, што адбываецца ў гэтым спеве, нейкія цікавыя малюнкі ўзніклі ў маёй падсвядомасці праз яго. Таму ён першы ў маім рэйтынгу.
2. Dzieciuki — Калі над лугам бусел праляцеў
Не магу сказаць, што я бесстаронні, абіраючы гэты трэк на другое месца ў маім «топе», бо я зараз граю ў гурце «DZIECIUKI», але мне гэты трэк па шчырасці падабаецца. Калі я яго першы раз пачуў, я нібы перанёсся дадому, у Беларусь.
3. ISNA TRIO feat Karalina Cicha — Кола жыве
ISNA TRIO — гэта эксперыментальны калектыў, які робіць нестандартную музыку, нарадзіўся ў чэрвені 2021 года падчас адной з арт-рэзідэнцый у Польшчы. Яго ўдзельнікі — вядомыя музыкі: Сяржук Доўгушаў, Аляксей Варсоба і Андрэй Еўдакімаў. Усе ў свой час эмігравалі з Беларусі. Названы трэк мне вельмі спадабаўся сваёй медытатыўнасцю і натхненнем, якое адчуў пасля ягонага праслухоўвання.
4. Ляпіс Трубецкой — Грай
Цікавая штука, ды й што яшчэ можна сказаць арыгінальнага пра «Ляпісаў», па-мойму, пра іх усё ўжо сказана. З важнага асабіста для мяне магу сказаць, што «Грай» я спяваў у якасці калыханкі сваёй дачцэ, калі яна была маленькая. Менавіта пад гэтую песню яна засынала найлепш.
5. Нейра Дзюбель — Жыццё
Проста класная музыка, проста класны трэк, проста класны гурт, які ў ва мне дужа адгукаецца. Першы раз пачуў песню адносна нядаўна, рыхтуючыся да канцэрту, які быў прысвечаны пяцідзесяцігоддзю Аляксандра Кулінковіча. Мне прапанавалі яе зайграць на дудзе разам з Алесем Дзянісавым. Па шчырасці, да гэтага часу я творчасць «Нейра Дзюбель» не надта слухаў, а тут адразу як маланкай жахнула. Пасля таго, як зайграў на канцэрце гэты трэк, ён застаўся надоўга ў маім плэй-лісце.
6. Tor band — Жыве Беларусь
Ну, тут усё зразумела, гэта нашае сэрца, нашая краіна, і інакш быць не можа. У мяне гэты трэк, думаю, як і ў большасці беларусаў, асацыюецца з пратэстамі, якія адбыліся ў 2020 годзе. Колькі мы пагулялі пад гэтую песеньку! У моманты, калі я яшчэ быў у Беларусі, калі было роспачна, вусцішна ад навінаў пра затрыманні, збіццё, іншы гвалт, калі апускаліся рукі, нейкім дзівосным чынам гэты трэк трапляўся мне ў навушніках, і тады ўсё ўва мне пачынала бурліць, гэта давала новыя сілы.
ПЖ, budzma.org