Пра ініцыятыву расказала дырэктар Смаргонскага гісторыка-краязнаўчага музея Алена Бобіна «Рэгіянальнай газеце».
— У 2023 годзе мы адзначаем 770-годдзе ад каранацыі Міндоўга, заснавальніка і першага ўладара ВКЛ, першага і апошняга караля Літвы. Думка аб усталяванні помніка вялікаму князю ў Навагрудку прагучала яшчэ ў далёкім 2003 годзе падчас Міжнароднай навуковай канферэнцыі, прысвечанай 750-годдзю каранацыі Міндоўга. У 2012 годзе было прынята адпаведнае рашэнне Навагрудскага райвыканкама. У 2015 райвыканкамам адкрыў дабрачынны рахунак для збору грошай, — распавядае Алена.
Яна звяртае ўвагу, што без дапамогі шырокага кола неабыякавых беларусаў у гэтай годнай і неабходнай для Беларусі справе помнік Міндоўгу на яго спадчынных землях можа так і не з’явіцца.
Дабрачынны рахунак па-ранейшаму адкрыты. Сталічны скульптар Сяргей Бандарэнка працуе над стварэннем помніка. Усе неабходныя дакументы, дамова на ахвяраванне, рэквізіты ёсць (на фота ўнізе).
Па словах Алены, працу скульптара падтрымлівае адзін годны спонсар, але грошай на ўвесь помнік у яго не хопіць.
— Гэта сціплая просьба і вялікі спадзеў на тое, што разам, супольным намаганнем мы зможам увекавечыць памяць пра асобу першага вялікага князя Літоўскага ў першай сталіцы старажытнай Літвы, і роўна памяць аб нашай дзяржаўнасці, — падсумавала Алена.
Фота будучага помніка і дакументаў забяспечаныя суразмоўцай.
