Анлайн-прэзентацыя беларускага пераклада рамана Шчэпана Твардаха «Кароль»

У чацвер, 30 сакавіка, завітайце на анлайн-прэзентацыю беларускага пераклада культавага рамана Шчэпана Твардаха «Кароль». Перакладчык — Мікола Раманоўскі.

---

 Дата: 30 сакавіка

Час: 15.00 (час мінскі, гэта 14.00 па варшаўскім часе)

Месца: старонка «Прасторы польскай культуры»

Госць — выдавец Андрэй Янушкевіч.

Шчэпан Твардах — адзін з лідараў сучаснай літаратурнай сцэны Польшчы, аўтар такіх скандальных і гучных раманаў, як «Морфій» (2012), «Драх» (2014), «Кароль» (2016), «Каралеўства» (2018), «Пакора» (2020), «Холад» (2022).

Вось пра што пойдзе гаворка:

«Кароль» як гістарычны раман, гангстарскі баявік і псіхалагічны дэтэктыў. Міжваеннае дваццацігоддзе, палітычны і крымінальны свет у творы.

«Польская» і «яўрэйская» Варшава: шматкультурнасць або вайна культур?

Праблема гвалту, віны і пакарання ў рамане. Чаго мы не ведалі пра лагер у Бярозе-Картузскай?

Суб’ектыўнасць памяці і праблема «ненадзейнага» апавядальніка, якому не варта празмерна даваць веры.

Асаблівасці мовы ў рамане і праблемы яго беларускага перакладу. Чым раман цікавы сучаснаму беларускаму чытачу?

Ладзіцца прэзентацыя ў межах цыклу літаратурных сустрэч «Санаторый пад клепсідрай» з Андрэем Хадановічам.

Проста далучайцеся да трансляцыі на старонцы «Прасторы польскай культуры».